العلاج الوظيفي

هو تخصص طبي أوحد تخصصات كلية التأهيل، ببساطة يهتم إنو يرجع للشخص قدرته على أداء المهام الي كان يعملها سابقاً قبل ما يتعرض للإصابة أو لأي شي يأثر على أداء مهامه.. يعني هاد الشخص ممكن يكون مريض أو تعرض لإصابة وممكن يكون شخص عادي تأثرت وظائف حياته لأسباب متنوعة وبدنا نساعده يرجع يقوم بمهامه بكفاءة
المعالج الوظيفي بتعامل مع حالات أطفال و كبار و كبار بالسن، ممكن المشاكل تكون حركية أو إدراكية أو نفسية
وبما إنو بنتعامل مع كل هاي الفئات بندرس تطور الإنسان من وهو جنين لنهاية حياته، وبنتطرق لكل مرحلة وشو بيتعرض الإنسان فيها من تغيرات جسمية وإدراكية ونفسية وغيرها، وبنعرف كيف بيكون الشخص بيتطور بشكل طبيعي وصحي وشو أعراض وعلامات إنو تطوره مش طبيعي وممكن يكون فيه خلل
المميز بتخصص العلاج الوظيفي هو وجود جانب إبداعي فيه يعني لازم تكون مشغل مخيلتك الإبداعية و التفكير خارج الصندوق أثناء الجلسة

مثلاً: لو نحكي مريض عنده ضعف بعضلات الإيد
أنا من خلال حالته ووضعه الصحي بقرر إذا إيدو قادرة تتحسن، معناها اشتغل على قدرات المريض و تقوية عضلاته
أما إذا صعب تتحسن بالوضع الراهن، فبشتغل على البيئة الي عايش فيها و أضيف عليها مساعدات من جبائر و غيره

⁦▪️⁩بمثال ضعف عضلات الإيد، أنا كمعالج وظيفي رح أصمم للمريض خطة علاجية مناسبة لشخصيته و ميوله، ممكن يكون يحب الزراعة، ف استثمر هاد الجانب بشخصيته بإنو أخليه يقوي عضلات إيده أثناء ماهو يزرع، و هيك هو طوّر مهاراته و قوّى عضلاته و استثمر موهبته
ولحتى نعمل هاد الشي ونعالج المريض عن طريق أنشطة بيحبها، كل نشاط بنستخدمه بنحلله، كيف يعني بنحلله؟
يعني كل حركة وكل جزء من هاد النشاط بنكون عارفين شو العضلات والمهارات الجسدية أو العقلية اللي رح يستخدمها المريض لحتى يقوم بهاد النشاط، وهل رح تأدي الهدف اللي بدي أشتغل فيه مع المريض ولا لأ
فبعالج المريض عن طريق إنه أخليه يعمل أنشطة إلها معنى وقيمة في حياته وهاد الشي بيخلي إقبال المريض على العلاج أكبر
⁦ومن الأشياء اللي بتميز تخصصنا إنه بيهتم بالجانب النفسي بشكل واسع، مرضى الاكتئاب، ثنائي القطب، الفصام،... إلخ
النا تدريب في مستشفيات ومراكز معنية بالجانب النفسي، ومش بس بنهتم بالجانب النفسي للي عندهم أمراض نفسية لأ، حتى المريض اللي بيجي عنا بسبب مشكلة جسدية ممكن تكون هاي المشكلة أثرت ع نفسيته
فمثلًا، صار أهدى أو صار عدواني بعد الإصابة، بطل يطلع من الدار، إصابته سببتله الشعور بالإحراج... إلخ، كل هاي الأشياء بتهمني كمعالج وظيفي، لإنه لما ييجيني مريض، لازم لازم أشوف كيف أثر هاد الشي عليه وعلى تفاعله مع بيئته، ومعرفة البيئة اللي بعيش فيها المريض جزء لا يتجزأ من العلاج، لإنه مشاكل البيئة بتأثر ع المريض وع تفاعله مع العلاج، لو كان مريض عنده مشاكل عائلية أو طفل متعرض لتنمر وهكذا، لازم ناخد هاي الأشياء بعين الاعتبار أثناء وضع الخطة العلاجية وتقييمنا للمريض

و التخصص في جانب عملي مهم جداً و واسع
يبدأ من سنة ثانية رح تكون اغلب المواد فيها جزء عملي و جزء نظري
و في تدريب بالمستشفى يبدأ من سنة ثالثة فصل ثاني و يستمر للتخرج و يكون بالمستشفيات الحكومية مثل مستشفى الجامعة و البشير و المدينة الطبية
:اماكن العمل
المستشفيات، مراكز التأهيل، المدارس، مراكز كبار السن، مراكز تأهيل المدمنين، المستشفيات المختصة بالاضطرابات العصبية و العقلية

عدد ساعات التخصص ١٣٥ ساعة (٤ سنوات، ما بتقدر تخلص قبل هيك لأنو التخصص سنوي)